สมัยก่อนในเขตเมืองเก่าของเจียงฮายมีสระเกษมเมืองโตยน่อครับ
เป๋นหนองน้ำสำหรับหื้อจาวเมืองไว้กิ๋นไว้ใจ้ มีอยู่ 2 หนอง คือ
"หนองสี่แจ่ง" กับ "หนองเมืองลวง" ครับ
"หนองสี่แจ่ง" อยู่ตั๊ดอภิสแควร์แลองค์ก๋ารโทรศัพท์น่อ
บ่าเดี่ยวยังมีจื่อ "สี่แยกหนองสี่แจ่ง" อยู่ แต่บางคนก็บ่ฮู้ตี้มาของจื่อหนี้ (นี้)
กำว่า สี่แจ่ง แสดงว่าหนองหนี้เป๋นฮูปสี่เหลี่ยม
"หนองเมืองลวง" อยู่ตั๊ดวิทยาลัยอาชีวศึกษา หนองหนี้เปิ้นว่ากว้างขนาดน่อ
คนบ่เก่าเล่าว่าถ้าน้ำนักๆก็ท่วมมาเถิงหลังวัดศรีเกิดเลยครับ
จื่อว่า "เมืองลวง" แสดงว่าเป๋นบ้านของคนเขินเมืองลวง (อยู่ในรัฐฉาน)
โดนกวาดมาอยู่เจียงใหม่ ก่อนขึ้นมาเจียงฮายน่อ
คนบ่าเก่าเปิ้นวางระบบชลประทานไว้โตย โดยจะขุดเหมืองเอาน้ำกก
เข้าเวียงตางปะตู๋เจียงใหม่ น้ำเหมืองไหลเลาะขะหนนธนาลัยมา
แล้วจะมาปะกับหนองเมืองลวงก่อน ก่อนน้ำจะไหลมาหนองสี่แจ่ง
ลุกหั้นน้ำก็จะไหลไปลงน้ำกกใกล้ๆปะตู่ต้อ (ท่อ) เปิ้นแป๋งต้อหื้อน้ำลอดออกเวียงไป
ปะตู๋เมืองตั๊ดหนี้เลยจื่อว่า "ปะตู๋ต้อ (ท่อ)" อี้น่อ
นอกจากหนี้ ตางใต้ของเวียงยังมี "หนองเขียว" คือ แถวๆโฮงแฮมวังคำบ่าเดี่ยว
หนองเขียว มันเขียวหยั่งใด น้ำจะสีเขียว กาว่าพืชลอยน้ำสีเขียว
กาว่ามีบ้านคนจื่อเขียวอยู่ใกล้ๆหนอง อันหนี้ก็บ่ฮู้น่อครับ
ยุคสมัยเปลี่ยนไป สระเกษมเมืองกับน้ำเหมืองในเวียงเจียงฮายก็โดนถม บางตี้แป๋งต้อ (ท่อ) ลอด
คนบ่าเดี่ยวเกิดบ่าตัน ก็บ่าฮู้ว่าคนบ่าเก่าเปิ้นวางระบบน้ำไว้หื้อเมินแล้ว
ขอขอบคุณ เชียงรายโฟกัส
